ଉପରାଷ୍ଟ୍ରପତି ଜଗଦୀପ ଧନକଡ଼ ଶନିବାର ବିଭିନ୍ନ କଳା କ୍ଷେତ୍ରର 84 ଜଣ କଳାକାରଙ୍କୁ ଏକକାଳୀନ ସଙ୍ଗୀତ ନାଟକ ଏକାଡେମୀ ଅମୃତ ପୁରସ୍କାର ପ୍ରଦାନ କରିଛନ୍ତି। 75 ବର୍ଷରୁ ଅଧିକ ବୟସର ଭାରତୀୟ କଳାକାରଙ୍କୁ ସମ୍ମାନିତ କରିବା ପାଇଁ ଏହି ପୁରସ୍କାର ଗଠନ କରାୟାଇଥିଲା, ଯେଉଁମାନେ ଏୟାବତ୍ ନିଜ କ୍ୟାରିୟରରେ କୌଣସି ଜାତୀୟ ସମ୍ମାନ ପାଇନାହାନ୍ତି।
ଏହି ପୁରସ୍କାର ପ୍ରଦାନ ଉତ୍ସବରେ ଯୋଗଦେଇ ଶ୍ରୀ ଧନଖଡ଼ କହିଛନ୍ତି ଯେ, ଦେଶର ଇତିହାସରେ ପ୍ରଥମ ଥର ପାଇଁ ଏହି କଳାକାରମାନଙ୍କୁ ସେମାନଙ୍କ କାର୍ୟ୍ୟ ପାଇଁ ସମ୍ମାନିତ କରାୟାଉଛି।
ଏହି ସବୁ କଳାକାର ହେଉଛନ୍ତି ସେହି କଳାକାର, ଯେଉଁମାନେ ଗତ 75 ବର୍ଷ ମଧ୍ୟରେ କେବେ ବି ସେମାନଙ୍କ ପ୍ରାପ୍ୟ ପାଇନାହାନ୍ତି। ସେମାନଙ୍କୁ ସମ୍ମାନ ଦେଇ ଆମେ ଭାରତୀୟ ସଂସ୍କୃତିକୁ ସମ୍ମାନ ଦେଇଥାଉ; ଏହା ବିଶ୍ୱରେ ଭାରତର ଗୌରବ ବୃଦ୍ଧି କରେ ବୋଲି ସେ କହିଛନ୍ତି।
ଉପରାଷ୍ଟ୍ରପତି ଆହୁରି ମଧ୍ୟ କହିଛନ୍ତି ଯେ ସରକାରଙ୍କ ଦ୍ୱାରା ଆରମ୍ଭ କରାୟାଇଥିବା ଅନେକ ଯୋଜନା ମାଧ୍ୟମରେ ଏଭଳି କଳାକାରମାନଙ୍କୁ "ଗଠନମୂଳକ ଢଙ୍ଗରେ" ସାହାୟ୍ୟ କରିବା ଗୁରୁତ୍ୱପୂର୍ଣ୍ଣ।
ଦୁନିଆରେ ବହୁତ କମ୍ ଦେଶ ଅଛନ୍ତି ଯେଉଁମାନଙ୍କ ସଂସ୍କୃତି 500-700 ବର୍ଷରୁ ଅଧିକ ପୁରୁଣା ନୁହେଁ। କିନ୍ତୁ ଭାରତର ସଂସ୍କୃତି 5 ହଜାର ବର୍ଷ ପୁରୁଣା। ତେଣୁ, ଏହି କଳାକାରମାନଙ୍କୁ ଆମେ ପ୍ରଶଂସା କରିବା, ସେମାନଙ୍କ ଯତ୍ନ ନେବା, ସେମାନଙ୍କୁ ସୁରକ୍ଷା ଦେବା, ସେମାନଙ୍କୁ ପୋଷଣ କରିବା ଏବଂ ସେମାନଙ୍କୁ ଏକ ଗଠନମୂଳକ ଢଙ୍ଗରେ ସାହାୟ୍ୟ କରିବା ଆବଶ୍ୟକ। ମୁଁ ଜାଣିଛି ଅନେକ ଅଭିନବ ସରକାରୀ ଯୋଜନା ରହିଛି, ଯେଉଁଥିରେ କଳାକାରମାନେ ସହାୟତା ପାଉଛନ୍ତି ବୋଲି ଶ୍ରୀ ଧନକର କହିଛନ୍ତି।
ଏହି ଉତ୍ସବରେ 70 ଜଣ ପୁରୁଷ ଓ 14 ଜଣ ମହିଳାଙ୍କ ସମେତ 84 ଜଣ କଳାକାର ପୁରସ୍କାର ଗ୍ରହଣ କରିଥିଲେ।
ଏହି ପୁରସ୍କାର ତାଲିକାରେ ଜମ୍ମୁ-କଶ୍ମୀରର କୃଷ୍ଣ ଲାଙ୍ଗୁ (ନାଟକ ଓ ସଙ୍ଗୀତ), ଗୋଆର ଜନ୍ କ୍ଲାରୋ ଫର୍ଣ୍ଣାଣ୍ଡିଜ୍ (ନାଟକ ରଚନା), ଝାଡ଼ଖଣ୍ଡର ମହାବୀର ନାୟକ (ଲୋକ ସଙ୍ଗୀତ ଓ ନୃତ୍ୟ) ଏବଂ ଲଦାଖର ସେରିଙ୍ଗ ଷ୍ଟାଞ୍ଜିନ୍ (ଲୋକ ସଙ୍ଗୀତ) ରହିଛନ୍ତି।
ଆନ୍ଧ୍ରପ୍ରଦେଶର ତିନି ଜଣ, ଅରୁଣାଚଳ ପ୍ରଦେଶର ଦୁଇ ଜଣ ଓ ମହାରାଷ୍ଟ୍ରର ଛଅ ଜଣ କଳାକାରଙ୍କୁ ମଧ୍ୟ ଏହି ସମ୍ମାନଜନକ ପୁରସ୍କାର ମିଳିଛି। ଉତ୍ତର ପ୍ରଦେଶ, ଗୁଜରାଟରୁ ତିନି ଜଣ ଏବଂ ପଞ୍ଜାବ ଓ ଦିଲ୍ଲୀରୁ ଦୁଇ ଜଣ ଲେଖାଏଁ ମନୋନୀତ ହୋଇଥିଲେ।
